ފަލަސްތީނުގެ މިނިވަން ދައުލަތެއް އުފެއްދުމާ ގުޅޭގޮތުން ބޭއްވޭ މަތީ ފަންތީގެ މަޝްވަރާ ބައްދަލުވުމެއްގައި ދިވެހިރާއްޖެއިން ބައިވެރިވާނެކަން މިއަދު ފޮރިން މިނިސްޓްރީއިން ބުނެފިއެވެ.
އެމެރިކާގެ ނިއުޔޯކުގައި ހުންނަ އދ. ގެ މަރުކަޒުގައި ދެ ދުވަހުގެ މުއްދަތަށް ކުރިއަށްދާ މި ބައްދަލުވުމުގައި ދިވެހިރާއްޖެ ތަމްސީލުކުރައްވާނީ އދ. އަށް ރާއްޖެއިން ކަނޑައަޅާފައި ހުންނެވި ދާއިމީ މަންދޫބު ޑރ. އަލީ ނަސީރު އަހުމަދުކަމަށް މިނިސްޓްރީން ހާމަކުރިއެވެ. އަދި މި ބައްދަލުވުމުގައި ދިވެހިރާއްޖެއިން ފަލަސްތީނުގެ ރައްޔިތުންނާއެކު ތިބިކަން ހާމަކުރައްވާ ބަޔާނެއް އިއްވާނެކަމަށްވެސް މިނިސްޓްރީއިން ބުންޏެވެ.
ފޮރިން މިނިސްޓްރީއިން ބުނީ ފަލަސްތީނު ރައްޔިތުންނަށް އަމާންކަމާއި އިންސާފު ހޯދައިދިނުމަށް ބައިނަލްއަގުވާމީ މުޖުތަމައުން ކުރަމުންދާ މަސައްކަތްތަކަށް ދިވެހިރާއްޖެއިން ފުރިހަމަ އެއްބާރުލުން ދޭނެކަމަށެވެ. މީގެ އިތުރުން، އދ. ގެ ގަރާރުތަކާ އެއްގޮތަށް، 1967 ގެ ސަރަހައްދީ އިންތަކުގެ ތެރޭގައި، އިރުމަތީ ޤުދުސްއަކީ ފަލަޞްތީނުގެ ވެރިކަންކުރާ ރަށްކަމުގައި ހިމެނޭގޮތަށް، ފަލަސްތީނުގެ މިނިވަން އަދި ސިޔާދަތީ ދައުލަތެއް ގާއިމުކުރުމަށް ދިވެހި ސަރުކާރުން ތާއީދުކުރާކަންވެސް ފާހަގަކުރިއެވެ.
ފްރާންސާއި ސައޫދީ އަރަބިއްޔާގެ އިސްނެގުމުގެ ދަށުން ބޭއްވޭ މި ބައްދަލުވުމުގެ ކުރިން، ވަޒީރުންގެ ފެންވަރުގައި އިތުރު މަޝްވަރާ ބައްދަލުވުމެއް ބޭއްވި، ބައްދަލުވުމުން ނެރެވޭނެ ނަތީޖާތަކާމެދު މަޝްވަރާކުރެވޭނެކަމަށް މިނިސްޓްރީން އިތުރަށް މައުލޫމާތު ދެއެވެ.
ކޮމެންޓް (0)
ލޯޑް ކުރަމުން...