ހުޅަނގު ބަރުމާއަށް ބިންހެލުމެއް އައިސްފި

ބަރުމާގެ ހުޅަނގުގެ ސަރަހައްދަކަށް ރިޗްޓަރ މިންގަނޣުން 5.8 ގެ ބިންހެލުމެއް އިއްޔެ ހެނދުނު އައިސްފައިވާކަމަށް ނައިޕިޓޯ ހައިޑްރޮލޮޖީ އެންޑް މީޓިއޮރޮލޮޖީ ޑިޕާޓްމެންޓުން ހާމަކޮށްފިއެވެ.

އެޑިޕާޓްމަންޓުން ބުނެފައިވާގޮތުގައި މިބިންހެލުމުގެ އެޕިސެންޓަރު ހަކާ ޕްރޮވިންސްގެ އިރުދެކުނުން 22.4 ކިލޯމީޓަރު އަދި މަންޑަލޭ ޕްރޮވިންސްގެ ހުޅަނގުއުތުރުން 216 ކިލޯމީޓަރު ހުންނާނެއެވެ.

މިބިންހެލުން އައިސްފައިވަނީ ބަރުމާގެ ގަޑިން ހެނދުނު 8:51 ގައި ކަމަށާއި އަދި މިބިންހެލުމުގެ އަސަރު މަންޑަލޭ އަދި ސަގައިގަންގ ސަރަޙައްދަށްކޮށްފައިވާކަމަށް ބަރުމާގެ މީޓިއޮރޮލިޖިކަލް ޑިޕާޓްމަންޓުން ހާމަކުރެއެވެ. މިބިންހެލުމާއި ގުޅިގެން އެއްވެސް މީހަކު މަރުވެފައިވާކަމަކަށް އަދި ޚަބަރުލިބިފައެއް ނުވެއެވެ.

ބަރުމާއަށް މިބިންހެލުން އައިސްފައިމިވަނީ ބަރުމާގެ މުސްލިމުންނާއި ދެކޮޅަށް އެޤައުމުގެ ސަރުކާރުންނާއި އަދި ބުދިސްޓު ފާދިރީންގެ އަނިޔާވެރިކަން އިންތިހާއަށް ބޮޑުވެފައިވާ ދުވަސްވަރެއްގައެވެ.