ސަރުކާރުން ރައްޔިތުންގެ މަޖިލީހަށް ހަތަރު ބިލެއް ހުށަހަޅައިފި

ސަރުކާރުން ރައްޔިތުންގެ މަޖިލީހަށް ހަތަރު ބިލެއް ހުށަހަޅައިފިއެވެ.

ރައީސް އޮފީހުން ވިދާޅުވީ، މި ‏‏ބިލުތަކުގެ ތެރޭގައި ހިމެނެނީ ޢިމާރާތްކުރުމުގެ ބިލާއި، ޤާނޫނު ނަންބަރު 2011/10 (މުދަލާއި ޚިދުމަތުގެ ‏‏އަގުން ޓެކްސް ނެގުމުގެ ޤާނޫނު) އަށް އިޞްލާޙް ގެނައުމުގެ ބިލާއި، ޖިނާއީ މައްސަލަތަކުގައި ޤާނޫނީ ‏‏އެހީތެރިކަން ބަދަލުކުރުމުގެ ބިލު‏‎ ‎‏އަދި ޤާނޫނު ނަންބަރު 2010/‏‎17‎‏ (ބިރުދެއްކުމާއި ނުރައްކާތެރި ‏‏ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު)‏‎ ‎‏އަށް އިޞްލާޙު ގެނައުމުގެ ބިލު ކަމަށެވެ.‏

ޢިމާރާތްކުރުމުގެ ބިލު ރައްޔިތުންގެ މަޖިލީހަށް ހުށަހަޅާފައިވަނީ ދިވެހިރާއްޖޭގެ ‏‏ޢިމާރާތްކުރުމުގެ ދާއިރާ ތަރައްޤީކޮށް، ކަނޑައެޅޭ ހަމަތަކަކާއި މިންގަނޑުތަކެއްގެ މަތިން އެ ދާއިރާ ‏‏ކުރިއަރުވައި ހިންގުމަށް ބޭނުންވާ ޤާނޫނީ އޮނިގަނޑު ޤާއިމުކުރުމަށާއި؛ ޢިމާރާތްތަކަކީ ރައްކާތެރި، ދުޅަހެޔޮ ‏‏ޞިއްޙަތަކަށް މަގުފަހިކޮށްދޭ، އަދި އެ ތަންތަން ބޭނުންކުރާ ފަރާތްތަކަށް ގެއްލުމެއް ނުލިބޭނެ ރައްކާތެރި ‏‏ތަންތަން ކަމުގައި ހެދުމަށް މަގުފަހިކުރުމަށާއި؛ ޢިމާރާތްކުރުމުގެ މަސައްކަތަކަކީ ރައްކާތެރި، ތަރައްޤީއާއި ‏‏އުފެއްދުންތެރިކަމަށް މަގުފަހިކުރާ، ތިމާވެއްޓާ ރައްޓެހި މަސައްކަތަކަށް ހެދުމުގެ އިތުރުން ޢިމާރާތްކުރުމުގެ‏‎ ‎‏ސިނާޢަތުގައި ޙަރަކާތްތެރިވާ ފަރާތްތަކަކީ ޤާބިލު، ފަންނުވެރި ބަޔަކަށް ހެދުމަށް މަގުފަހިކުރުމުގެ ‏‏މަޤްޞަދުގައެވެ. ‏

‏ޤާނޫނު ނަންބަރު 2011/10 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) ‏‏އަށް އިޞްލާޙް ހުށަހެޅުމުގެ ބޭނުމަކީ، މިހާރު ޢަމަލުކުރަމުންދާ ޤާނޫނުގެ ދަށުން ދިވެހިރާއްޖޭގެ އެތެރޭގައި ‏‏ވައިގެ ދަތުރުފަތުރުގެ ޚިދުމަތް ދޭ ފަރާތްތަކުން ވިއްކާ މުދަލާއި ދޭ ޚިދުމަތުން ނަގާ ޓެކްސް، ‏‏ޓޫރިސްޓުންނެކޭ އެއްފަދައިން ދިވެހިންގެ އަތުންވެސް ނެގެނީ ޓޫރިޒަމް ދާއިރާގެ މުދަލާއި ޚިދުމަތުން ޓެކްސް ‏‏ނެގޭ ރޭޓުން ކަމުގައިވާތީއާއި، މިހާރު އެ ޤާނޫނު އޮތްގޮތުން، ޓޫރިސްޓް ރިޒޯޓުތަކާއި ހޮޓާތަކާއި ‏‏ގެސްޓްހައުސްތަކާއި އެނޫންވެސް އެފަދަ ތަންތާނގައި މުވައްޒަފުންނަށް ޚާއްޞަކޮށްގެން ހިންގާ ފިހާރަތަކުން ‏‏ވިއްކާ މުދަލާއި ދޭ ޚިދުމަތްވެސް ބެލެވެނީ ޓޫރިޒަމް ދާއިރާގެ މުދަލާއި ޚިދުމަތުގެ ގޮތުގައި ކަމަށްވެފައި، ‏‏އެފަދަ ފިހާރަތަކުން ވިއްކާ މުދަލާއި ދޭ ޚިދުމަތުން އެ މުވައްޒަފުންގެ އަތުން ޓެކްސް ނެގެނީ ޓޫރިޒަމް ‏‏ދާއިރާގެ މުދަލާއި ޚިދުމަތުން ޓެކްސް ނެގޭ ރޭޓުން ކަމުގައިވާތީއާއި، ޓޫރިޒަމް ދާއިރާގެ މުދަލާއި ‏‏ޚިދުމަތުން ޓެކްސް ނެގޭ ރޭޓު، މިއަހަރުގެ ނޮވެންބަރު މަހުން ފެށިގެން %12 އަށް ބޮޑުވާނެތީ، އެ ‏‏ތާރީޚުގެ ކުރިން އެކަން އިޞްލާޙުކޮށް، އެނޫން ދާއިރާތަކުގެ މުދަލާއި ޚިދުމަތުން ޓެކްސް ނެގޭ ރޭޓު ‏‏ކަމުގައިވާ %6 އިން ދިވެހިންގެ އަތުން އެ ޓެކްސް ނެގޭނެ ގޮތަށް ހަމަޖެއްސުމަށްޓަކައި އެ ޤާނޫނަށް ‏‏ގެންނަންޖެހޭ އިޞްލާޙުތައް ގެނައުމެވެ.‏

‏ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ބިލު ހުށަހަޅާފައިވަނީ، ‏‏މީހުންނާއި ކުޑަކުދިން ޓްރެފިކްކުރުމާއި، މަސްތުވާތަކެތި ޓްރެފިކްކުރުމާއި، ކުޑަކުދިންނާ ދެކޮޅަށް ހިންގޭ ‏‏ކުށްކުށާއި، މަނީ ލޯންޑްރިންގއާއި ޓެރަރިޒަމަށް ފައިސާ ހޯދައިދިނުމާއި، ޓެރަރިޒަމްގެ ކުށްކުށާއި ‏‏އެނޫންވެސް ބޮޑެތި ޖިނާއީ ކުށްކުށް، ބައިނަލްއަޤްވާމީ ފެންވަރުގައި ފުޅާ ދާއިރާއެއްގައި ހިނގަމުންދާ ‏‏ޒަމާނެއްގައި، ޖިނާއީ މައްސަލަތަކުގައި ބޭރު ޤައުމުތަކާއި ދިވެހިރާއްޖެއާ ދެމެދު ޤާނޫނީ އެހީތެރިކަން ‏‏ބަދަލުކުރުމުގެ ނިޒާމެއް އެކަށައެޅުމަކީ މުހިންމު ކަމެއް ކަމުގައިވާތީ، ބޭރު ޤައުމުތަކުގައި ހިންގާ ޖިނާއީ ‏‏ޝަރީޢަތްތަކަށް ނުވަތަ ތަޙްޤީޤުތަކަށް ބޭނުންވާ ދިވެހިރާއްޖޭގައިވާ ހެއްކާއި އެނޫންވެސް އެއްޗެހި ހޯދައި އެ ‏‏ޤައުމުތަކަށް ގެންދިޔުމުގައި، އަދި ބޭރު ޤައުމުތަކުގައި ހިނގާ ޝަރީޢަތްތަކުގައި ހެކި ދިނުމަށްޓަކައި ނުވަތަ ‏‏ތަޙްޤީޤުތަކުގައި އެހީތެރިވުމަށްޓަކައި ދިވެހިރާއްޖޭގައިވާ މީހުން އެ ޤައުމުތަކަށް ދަތުރުކުރުމުގެ އިންތިޒާމު ‏‏ހަމަޖެއްސުމުގައި ބޭރު ޤައުމުތަކުން ދިވެހިރާއްޖެއަށް ހުށަހަޅާ ހުށަހެޅުންތަކާގުޅޭ އިންތިޒާމުތައް ‏‏ހަމަޖައްސައިދިނުމަށާއި؛ ދިވެހިރާއްޖޭގައި ހިންގާ ޖިނާއީ ޝަރީޢަތްތަކަށް ނުވަތަ ތަޙްޤީޤުތަކަށް ބޭނުންވާ ‏‏ބޭރު ޤައުމުތަކުގައިވާ ހެއްކާއި އެނޫންވެސް އެއްޗެހި ހޯދައި ދިވެހިރާއްޖެއަށް ގެނައުމުގައި، އަދި ‏‏ދިވެހިރާއްޖޭގައި ހިންގާ ޝަރީޢަތްތަކުގައި ހެކި ދިނުމަށްޓަކައި ނުވަތަ ތަޙްޤީޤުތަކުގައި އެހީތެރިވުމަށްޓަކައި ‏‏ބޭރު ޤައުމުތަކުގައިވާ މީހުން ދިވެހިރާއްޖެއަށް ދަތުރުކުރުމުގެ އިންތިޒާމު ހަމަޖެއްސުމުގައި ބޭނުންވާ އެހީ ‏‏ހޯދުމަށް މަގުފަހިކުރުމަށްޓަކައި ބޭނުންވާ ޤާނޫނީ ނިޒާމު އެކަށައެޅުމަށެވެ.‏

‏ސަރުކާރުން ރައްޔިތުންގެ މަޖިލީހަށް ހުށަހެޅުމަށްޓަކައި ފޮނުވާފައިވާ ބިރުދެއްކުމާއި ‏‏ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނަށް އިޞްލާޙު ގެނައުމުގެ ބިލު ‏‏ހުށަހަޅާފައިވަނީ، ދިވެހިރާއްޖޭގައި މިހާރަކަށް އައިސް ތޫނު އެއްޗެއްސާއި ނުރައްކާތެރި ހަތިޔާރު ‏‏ބޭނުންކޮށްގެން ހިންގާ މާރާމާރީގެ ކުށްތައް އިތުރުވަމުންދާތީ، އެފަދަ ކުށް ކުރުން ހުއްޓުވައި ޢާންމުންގެ ‏‏މެދުގައި އުފެދިފައިވާ ބިރުވެރިކަމާއި ހާސްކަން ފިލުވުމަށްޓަކައި އަދި މުޖުތަމަޢުގެ އަމާންކަމާއި ‏‏ޞުލްޙަވެރިކަން ޤާއިމުކުރުމަށްޓަކައި ޚާއްޞަ ފިޔަވަޅުތަކެއް އަޅަންޖެހޭކަމަށް ޤަބޫލުކުރެވޭތީ، މީސްމީހުންގެ ‏‏ފުރާނައާއި ހަށިގަނޑަށް ގެއްލުން ލިބޭގޮތަށް ނުވަތަ ގެއްލުމެއް ލިބިދާނެ ފަދަ ގޮތަކަށް ތޫނު އެއްޗެއްސާއި ‏‏ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުމަކީ ކުށް ކަމުގައި ކަނޑައެޅުމަށާއި، އެ ކުށްކުށާ ‏‏އެކަށީގެންވާ އަދަބު ކަނޑައެޅުމަށާއި، އެފަދަ ކުށްކުށުގެ ތުހުމަތުގައި ބަންދުކުރެވޭ މީހުންނަށް ‏‏ޤާނޫނުއަސާސީން ލިބިދޭ ބައެއް އަސާސީ ޙައްޤުތައް، މުޖުތަމަޢުގެ ސަލާމަތާއި ހަމަޖެހުމަށްޓަކައި، ‏‏ޤާނޫނުއަސާސީގެ 16 ވަނަ މާއްދާގެ ދަށުން ހަނިކުރުމަށެވެ.‏